Lög Samfylkingarfélagsins í Reykjavík
1. grein
Félagið heitir Samfylkingarfélagið í Reykjavík. Heimili þess og varnarþing er í Reykjavík.
2. grein
Tilgangur félagsins er að vera vettvangur einstaklinga sem standa að Samfylkingunni í Reykjavík, til umræðna og ályktana um félagshyggju, jafnaðarstefnu og kvenfrelsi. Jafnframt skal félagið vera bakhjarl og samráðsaðili kjörinna fulltrúa og frambjóðenda til Alþingis og sveitastjórna á vegum Samfylkingarinnar í Reykjavík.
3. grein
Allir íbúar Reykjavíkur eldri en 16 ára sem ekki eiga aðild að öðrum stjórnmálaflokki geta verið félagsmenn. Enginn félagsmaður getur haft nema einfaldan atkvæðisrétt í félaginu eða greitt atkvæði í umboði annarra. Félagsmaður getur verið félagsmaður í öðru aðildarfélagi Samfylkingarinnar en þegar kemur að kosningum á landsfund eða í fulltrúaráð velur félaginn í hvaða félagi hann vill greiða atkvæði til að koma í veg fyrir að hann hafi tvöfaldan atkvæðisrétt. Til að eiga atkvæðisrétt í SffR skal hann tilkynna stjórn val sitt fyrir upphaf kjörfundarins.
4. grein
Stjórn félagsins skal skipuð 7 aðalmönnum og 5 til vara. Í aðalstjórn skulu sitja ásamt formanni, varaformaður, ritari, gjaldkeri og 3 meðstjórnendur. Formaður skal ekki sitja lengur en í 3 starfsár í senn. Varastjórn skal kjörin í einu lagi, og telst sá fyrsti varamaður, sem flest atkvæði hlýtur eða er efstur á lista sé varastjórn einróma kjörin og svo koll af kolli. Stjórnarfund skal boða með minnst tveggja sólarhringa fyrirvara nema allir stjórnarmenn samþykki styttri frest og eiga varamenn jafnan rétt til fundarsetu með málfrelsi og tillögurétti en eigi atkvæðisrétti, nema viðkomandi aðalmaður sé fjarverandi. Stjórnarfundur telst löglegur hafi verið löglega til hans boðað og minnst 4 stjórnarmenn séu mættir. Einfaldur meirihluti ræður komi til atkvæðagreiðslu á stjórnarfundum. Óheimilt er að efna til fjárhagslegra skuldbindinga á vegum félagsins nema stjórnarsamþykkt liggi fyrir.
5. grein
Stjórn félagsins skal boða til allra funda sem haldnir eru á vegum Samfylkingarfélagsins í Reykjavík. Fundi skal boða með minnst fimm daga fyrirvara. Til aðalfundar skal þó boða með minnst þriggja vikna fyrirvara. Fundir skulu boðaðir bréflega, í rafrænum pósti og/eða með auglýsingum í fjölmiðlum. Stjórninni er skylt að boða til fundar ef minnst 30 skráðir félagsmenn sbr. 3. gr. óska þess skriflega og tilgreina fundarefni. Stjórnin getur einnig haldið opna umræðufundi sem auglýstir eru á heimasíðu félagsins, með tölvupósti og með dagblaðaauglýsingum.
6. grein
Aðalfundur félagsins skal haldinn fyrir 1. mars ár hvert. Aðalfundur skal boðaður með þriggja vikna fyrirvara en dagskrá skal send út með minnst 5 daga fyrirvara og er fundurinn lögmætur sé löglega til hans boðað. Reikningsár félagsins er almanaksárið. Fastir dagskrárliðir aðalfundar skulu vera: Skýrsla stjórnar félagsins Endurskoðaðir ársreikningar félagsins Lagabreytingar Ákvörðun um félagsgjald Kosning formanns Kosning annarra í stjórn Kosning tveggja skoðunarmanna reikninga félagsins Kosning í nefndir a) Uppstillingarnefnd b) Aðrar nefdir sem aðalfundur ákveður. Önnur mál.
7. grein
Tillögur til lagabreytingar þurfa að hafa borist stjórn 2 vikum fyrir boðaðan aðalfund. Lagabreytingartillögur skulu sendar út með öðrum fundargögnum minnst viku fyrir fund.Tillaga að lagabreytingum telst samþykkt fái hún 2/3 hluta greiddra atkvæða.
8. grein
Á aðalfundi skal kjósa þriggja manna uppstillingarnefnd og einn til vara. Hlutverk nefndarinnar er að leggja fram tillögur um frambjóðendur til kjörs formanns, stjórnar, varastjórnar og annarra starfa fyrir féalgið sem kosmið er um á aðalfundi. Tillögur uppstillingarnefndar um stjórn félagsins skulu liggja fyrir á skrifstofu félagsins minnst 5 sólarhringum fyrir aðalfund félagsins. Aðrar tillögur skulu berast skrifstofu félagsins minnst 2 sólarhringum fyrir boðaðan aðalfund.
9. grein
Félaginu verður því aðeins slitið að tillaga þess efnis berist stjórn félagsins undirrituð af minnst 30 félagsmönnum. Þannig fram komin tillaga skal takast til afgreiðslu á tveimur löglega boðuðum fundum í félaginu og þarf 2/3 hluta greiddra atkvæða á hvorum fundi um sig til þess að tillagan teljist samþykkt. Ekki skal líða lengri tími milli funda en sex vikur.
Samþykkt á aðalfundi Samfylkingarfélagsins í Reykjavík 29. janúar 2005 og með breytingum á aðalfundi 3. mars 2010.